Organisering og gjennomføring av tvangsevakueringa hausten 1944: Arbeidet til evakueringskommisjonen i Tromsø

Abstract

Denne avhandlinga tar for seg organiseringa og gjennomføringa av tvangsevakueringa av Finnmark og Nord-Troms, med utgangspunkt i arbeidet til evakueringskommisjonen som sat i Tromsø. Her vert dei mest sentrale aktørane tatt opp, som saman med evakueringskommisjonen, var Nasjonal Samling (NS), Reichskommissariat (RK) og Wehrmacht. Det som er hovudfokus i forhold til desse aktørane er samspelet mellom dei, konfliktar som oppstod og korleis samarbeidet var. Kven som var den leiande part vert også sedd på. Innanfor desse organisasjonane er det viktige enkeltpersonar som er verd å sjå nærmare på. Ragnar A. Hansen i evakueringskommisjonen, Jonas Lie og Johan Andreas Lippestad i NS og Josef Terboven i RK. Desse personane var svært sentrale under tvangsevakueringa, og er ein viktig del av denne avhandlinga. Her har det vore viktig å sjå på kva dei gjorde, og kva rolle dei spela innanfor tvangsevakueringa.

Dei lokale føresetnadane i Tromsø hadde også mykje å seie i tvangsevakueringa. Sjukehusplassar, innkvartering av evakuerte, forsyningssituasjonen og alle dei som hjelpte til i byen var av stor betydning for kor godt ein klarte å løyse denne krisa, og er noko som vert undersøkt her.