"Ravget iežas bođuid ovddežis". Guovddášpersovnnaid iešvuođat, rollat ja ovdáneapmi sámi perspektiivvas ja narratologiija guorahallamiin Earrodearvvuođat ja Jievjaheargi noveallain

Abstract

Guorahalan noveallaid Earrodearvvuođat ja Jievjaheargi váldo- ja oalgepersovnnaid iešvuođaid, rollaid ja ovdáneami muitalusain. Persovdnaguorahallamis suokkardallan persovnnaid siskkáldas- ja olgguldasiešvuođaid, ja mo dat váikkuhit dihto elemeanttaide ja dáhpáhusaide maid válljen guorahallat. Elemeanttaid maid válljen guorahallat čatnasat man nu láhkai sámi kultuvrii. Háliidan guorahallat teavsttaid sihke oarjemáilmmi- ja eamiálbmotmetodologiijan, ja dan láhkai gođđit oktii guovtti máilmmi kultuvrra, máilmmioainnu, jurddašanvuogi, árbbi ja árvvuid. Persovnnaid iešvuođat bohtet oidnosii sihke vuosttaš- ja goalmmátpersovnna muitaleaddji jienain. Dasa lassin leat dialogat ja muitaleaddji stiillaid geavaheapmi dehálaš gaskaoapmi go lohkki háhka dieđuid persovnnaid birra. Guorahalan persovnnaid rollaid muitalusas, ja mo sii doibmet gaskaneaset. Loahpalaččat suokkardalan persovnnaid ovdáneami ja gaskavuođaid teavsttain. Dan oasis vuhtii válddán elemeanttaid maid teaksta ieš bovde guorahallat. Dan láhkai lavttán teavstta ja konteavstta. Geavahan narratologiija, konteakstamáhttu ja luohteteoriija analiisabarggus, ja dainna vugiin doahttalan sámi perspektiivva, nu mo sámi gulahallanvugiid ja jurddašeami sámi servvodagas. Fáddásánit: váldopersovdna guorahallan - sámi girjjálašvuohta – eamiálbmotperspektiivva – sámi perspektiivva – luohteteoriija - narratologiija - sámi gulahallanvuohki – sámi jurddašanvuohki