Bestseljarar i bokhandel og bibliotek. Ein analyse av Mors gaver (2013) og De usynlige (2013) i eit litteratursosiologisk perspektiv.

Abstract

I Noreg har me nokre av verdas beste litteraturpolitiske støtteordningar som skal fremje ein mangfaldig norsk litteratur. Likevel ser me at litteraturen me les blir meir underhaldningsretta og meir einsretta. I oppgåva har eg sett på dei mest selde og utlånte bøkene i 2014. Listene over desse bøkene er i stor grad prega av populærlitteratur innanfor sjangrane krim og melodrama. To bøker skil seg ut, Mors gaver av Cecilie Enger og De usynlige av Roy Jacobsen. Begge bøkene er kritikarroste og har blitt bestseljarar. I oppgåva har eg undersøkt kva faktorar som har medverka til at desse bøkene vart bestseljarar. Eg har sett på både kvalitative og kontekstuelle faktorar. Eg har vurdert kvaliteten i bøkene ved å gjere ein kort litterær analyse av bøkene og sett denne opp mot mottakinga bøkene fekk i media. Dei kontekstuelle faktorane har eg undersøkt ved å sjå nærare på omslaga av bøkene og korleis desse kan seie noko om kvalitet og marknadsføring ved hjelp av teori om paratekst. I tillegg har eg sett på kor bøkene kan plasserast i dagens bokmarknad mellom anna i høve krinsløpsteori og litterære tendensar.